Event

በርካቶችን ከወደቁበት ጎዳና ለመነሳት ያለመ ታላቅ ሀገር አቀፍ ዝግጅት

  • መጋቢት 06 - 7.00 pm - 12:00 pm | March 15 - 1.00 pm - 6:00 pm
  • ሚሊኒየም አዳራሽ ፣ አዲስ አበባ ፣ ኢትዮጵያ | Millennium Hall, Addis Ababa, Ethiopia.

በርካታ ጎዳና ላይ የወደቁ ሰዎች መነሳት እንዲችሉ እጅግ የላቀ አስተዋፅኦ በማበርከትዎ እጅግ አድርገን በአረጋውያንና በአዕምሮ ሕሙማኑ ስም እናመሰግናለን፡፡ መቄዶንያ የአረጋውያንና የአዕምሮ ህሙማን መርጃ ማዕከል ምንም ጧሪና ደጋፊ የሌላቸውን በተለይም ደግሞ እራሳቸውን ችለው መፀዳዳት፣ መመገብ እና መንቀሳቀስ የማይችሉ የአልጋ ቁራኛ የሆኑና የሰው ድጋፍ የሚያስፈልጋቸው አረጋውያንና የአዕምሮ ህሙማንን ከወደቁበት ጎዳና ላይ በማንሳት ኮተቤ ብረታ ብረት አጠገብ በሚገኝ መኖሪያ ቤት ግቢ ውስጥ 40 የሚሆኑ አረጋውያንንና አዕምሮ ሕሙማንን ከወደቁበት ጎዳና ላይ በማንሳት ስራውን የጀመረ ሲሆን ማዕከሉ ድጋፍ የሚያደርግላቸውን አረጋውያንና አዕምሮ ሕሙማን ከተለያዩ የሀገሪቱ ከተሞች ጎዳናዎች ላይ የዘር፣ የሐይማኖት እና የፆታ ልዩነት ሳይደረግ ደጋፊ ያጡ በመሆናቸው ብቻ ከአካባቢው ነዋሪዎች በሚሰበሰብ መረጃ ከወደቁበት ተነስተው ማዕከሉን ተቀላቅለው የምግብ፣ የአልባሳት፣ የመጠለያና የሕክምና ድጋፍ እንዲያገኙ በማድረግ በ2004 ዓ.ም ተቋቋመ፡፡ ማዕከሉ ስራውን የጀመረበት መኖሪያ ግቢ እየተረዱ የነበሩትን ተገልጋዮች ለማኖር በቂ ባለመሆኑ ተጨማሪ 3 የመኖሪያ ግቢዎችን በአቅራቢያው በመከራየት በወር 50 ሺህ ብር ለቤት ኪራይ ብቻ በማውጣት አገልግሎቱን የቀጠለ ሲሆን በ2007 ዓ.ም በወቅቱ የተረጂዎቹ ቁጥር 700 በነበረበት ወቅት አያት ኮንዶሚንየም አጠገብ 30 ሺህ ካሬ ሜትር ቦታ ተረክቦ በቦታውም ላይ መኖሪያዎች ተገንብተው በአሁኑ ሰዓት 2,000 በላይ የሚሆኑ ተረጂዎችን እየረዳ ይገኛል፡፡
በአጠቃላይ የተረጂዎችን ቁጥር በሦስት ዓመት ጊዜ ውስጥ ወደ 10,000 ለማድረስ በከፍተኛ ሁኔታ እየተንቀሳቀስን እንገኛለን፡፡ መቄዶንያ የአረጋውያንና የአዕምሮ ሕሙማን መርጃ ማዕከል ከ1.2 ቢሊዮን ብር በላይ የሚፈጅ ባለ 2 ቤዝመንት ግራውንድ ፕላስ 11 (2B+G+11) የሆነ ዘመናዊ ሆስፒታልና ምቹ የአረጋውያን መኖሪያ ህንፃ ከነቴራሱ 15 ወለሎች ያሉትና 3,600 ካ.ሜ ቦታ ላይ የሚያርፍ፣ ለሕክምና ብቻ 1,200 አልጋዎች ያሉት፣ 5,000 ሰው የሚይዝ አዳራሽ፣ ለ120 መኪኖች የማቆሚያ ስፍራ ያለው፣ ለአካል ጉዳተኞችና አቅመ ደካሞች ምቹ የሆነ ሕንፃ በከፍተኛ ፍጥነት ሌት ከቀን እየገነባ ሲሆን በአሁኑ ሰዓት የሕንፃው ግንባታ በተጀመረ በ1 ዓመት ጊዜ ውስጥ 25% ተጠናቋል፡፡ ሕንፃው የደረሰበትን ደረጃ መጥታችሁ ብትጎበኙ ደስታችን የላቀ ነው፡፡ ሕንፃውን ለመገንባት የተለያዩ የገቢ ማስገኛ ዘዴዎችን የሚጠቀም ሲሆን ከነዚህም ውስጥ አንዱ እሁድ መጋቢት 6/2012 ዓ.ም ከቀኑ 7፡00 ሰዓት ጀምሮ እስከ ምሽቱ 12፡00 ሰዓት ድረስ በሚሊኒየም አዳራሽ ታላቅ የምስጋናና የገቢ ማሰባሰቢያ ዝግጅት ያደርጋል፡፡ ዝግጅቱ በቴሌቪዥን ጣቢያዎች አማካኝነት የቀጥታ ስርጭት ሽፋን የሚያገኝ ይሆናል፡፡
ይኅዉ ሀገር አቀፍ የሆነ ታላቅ ዝግጅት በርካቶች ከወደቁበት ጎዳና መነሳት እንዲችሉ ከፍተኛ ሚና ያለዉ ሲሆን፤ በዕለቱ የሀገሪቷ ርዕሰ ብሔርን ጨምሮ እስከ 30ሺህ የሚሆኑ ሠዎች፣ የዕምነት መሪዎች፣ ከፍተኛ የመንግስት ባለስልጣናት፣ ምሁራን፣ ነጋዴዎችና ሠራተኞች ሰውን ለመርዳት ሰው መሆን በቂ ነው በሚለው መርሕ መሰረት በአጠቃላይ ሁሉም የህብረተሰብ ክፍሎች እንደሚገኙ ይጠበቃል፡፡

Donate